|
Пісьменнік-юбіляр Зорка палескага краю |
20.11.2018 |
|
|
Пачынаецца ўсё з любві, А інакш і жыць немагчыма. |
20 лістапада спаўняецца 70 год з дня нараджэння адной з лепшых беларускіх паэтэс сучаснасці Яўгеніі Янішчыц. Нарадзілася «палеская ластаўка» ў вёсцы Рудка Пінскага раёна Брэсцкай вобласці ў сялянскай сям’і. У свой час скончыла філалагічны факультэт БДУ, працавала загадчыцай бібліятэкі, літкансультантам «Сельскай газеты», у рэдакцыі часопіса «Маладосць». У рэспубліканскім друку Яўгенія Янішчыц дэбютавала ў 1964 годзе. Яе паэзія складае такія зборнікі, як «Снежныя грамніцы», «Дзень вечаровы», «Ясельда», «На беразе пляча», «Пара любові і жалю», «Каліна зімы» і іншыя. У 1976 годзе ў Магілёве паэтка трапіла ў аўтамабільную аварыю, якая надоўга прыкавала яе да бальнічнага ложка. Яна так і не здолела перамагчы фізічны боль і пакуты, што паўплывала на яе дэпрэсіўныя настроі ў апошнія гады жыцця. Не стала «палескай ластаўкі» 25 лістапада 1988 года.
Яўгенія Янішчыц – паэт-лірык, а гэта значыць, што трывогі і радасці свету паўстаюць у яе творах прапушчанымі праз уласнае сэрца. Свет яе паэзіі багаты і шматгранны. Нягледзячы на многія жыццёвыя пакуты, паэзія Я. Янішчыц да канца засталася шчырай, прасветленай, настроенай на чысціню і дабрыню.
У сувязі з юбілеем паэткі бібліятэкі сеткі аформілі выставы і тэматычныя паліцы: «Зорка палескага краю» (Маслакоўская сельская аб’яднаная бібліятэка), «Святло далёкай зоркі» (Красулінская сельская бібліятэка), «Доля мая – нібы гронка любові…» (цэнтральная бібліятэка імя М. Гарэцкага). У Гарской сельскай аб’яднанай бібліятэцы прайшлі громкія чытанні «Паэзія Яўгеніі Янішчыц», падчас якіх бібліятэкар пазнаёміла прысутных з біяграфіяй паэтэсы і лепшымі ўзорамі яе паэзіі.
