Не змоўкне голас песняроў…
Гэты год адзначаны такім значным юбілеем, як 135-годдзе класікаў беларускай літаратуры Янкі Купалы і Якуба Коласа. Гэтыя пісьменнікі ўнеслі неацэнны ўклад у развіццё і нават станаўленне новай беларускай літаратуры. Іх творы заўсёды актуальныя, закранаюць важныя праблемы і тэмы. «Новая зямля», «Паўлінка», «На ростанях», «Раскіданае гняздо», «Дрыгва», «Магіла льва»… І гэта толькі малая частка той вялікай спадчыны, якую пакінулі пасля сябе гэтыя зоркі нашага літаратурнага небасхілу. Сумесна з клубам «Родник» УА БДСГА цэнтральная бібліятэка імя М. Гарэцкага падрыхтавала з нагоды юбілея літаратурна-музычную кампазіцыю «Песняры народных дум і светлых спадзяванняў» для студэнтаў акадэміі. Мерапрыемства праводзілася ў інтэрнатах №3 і №5. З дапамогай мультымедыйнай прэзентацыі арганізатары «правялі» ўдзельнікаў па жыццёваму і творчаму шляху класікаў, асабліва засяродзілі ўвагу на такім цікавым моманце з біяграфіі пісьменнікаў, як неаднаразовае наведванне імі нашага горада і акадэміі. На мерапрыемстве гучалі вершы аўтараў у выкананні саміх студэнтаў, а таксама аўдыёзапісы з вершамі «Спадчына», «Мой родны кут», пакладзенымі на музыку. Таксама ўдзельнікі мелі магчымасць азнаёміцца з выставай літаратуры «Не змоўкне голас песняроў», на якой былі прадстаўлены кнігі Якуба Коласа і Янкі Купалы. Супрацоўнікі Ленінскай сельскай аб’яднанай бібліятэкі правялі для дзяцей малодшага школьнага ўзросту агляд-прэзентацыю «Свайму народу – песень дар» падчас якой пазнаёмілі юных чытачоў з біяграфіяй «вялікіх сыноў свайго часу і сваёй краіны», іх багатай спадчынай.
