«Аўтограф на памяць»
Што можа зрабіць кнігу ўнікальнай, непадобнай на іншыя? Адказ просты: Аўтограф. Ужо сам факт таго, што аўтар трымаў кнігу ў руках, пакінуў у ёй дароўны надпіс і свой аўтограф надае ёй асаблівую каштоўнасць. Кніга з аўтографам – гэта памяць, цэлая гісторыя. За шмат гадоў фонд цэнтральнай бібліятэкі імя М. Гарэцкага сабраў немалую колькасць кніг, уласнаручна падпісаных аўтарамі. Яны перадаваліся бібліятэцы самімі пісьменнікамі, сустрэчы з якімі праходзілі ў сценах установы або кнігі якія тут прэзентаваліся.
Сёння кожны зацікаўлены чытач можа ўбачыць гэтую ўнікальную калекцыю ў чытальнай зале бібліятэкі, дзе выданні з аўтографамі складаюць экспазіцыю «Аўтограф на памяць», якая дзейнічае ўвесь час. Сярод падпісаных выданняў – кнігі гасцей горада і мясцовых аўтараў, мастацкая і навукова-папулярная літаратура. Тут можна пабачыць аўтографы Янкі Брыля, Рыгора Барадуліна, Ніла Гілевіча, Уладзіміра Арлова, Алеся Пісьмянкова, Сяргея Законнікава, такіх аўтараў зямлі горацкай, як Ганна Аронава, Валянціна Мажугіна, Аляксандр Клачкоў. Уваходзяць у экспазіцыю і кнігі накшталт краязнаўчага нарыса Віктара Арцем’ева «Радзішына», навукова-папулярныя выданні С.С. Бабова «Физика почв», У.М. Ліўшыца «Горкі: старонкі гісторыі» і «Евреи в Горках: судьбы и дела». І гэта пералік далёка не ўсіх «удзельнікаў» экспазіцыі.
Кожная з кніг мае свой непаўторны надпіс, астаўлены рукой самога аўтара. Напрыклад, кнігу «Жыватворны сімвал Бацькаўшчыны: Гісторыя крыжа святой Еўфрасінні Полацкай» Уладзімір Арлоў падпісаў так: «Шаноўным чытачам Горацкай раённай бібліятэкі з самымі светлымі пачуццямі. Няхай святая Еўфрасіння Полацкая і яе жыватворны крыж бароняць Вас і нашу родную Беларусь ад усіх цёмных сілаў». Пазнаёміцца з іншымі аўтографамі запрашаем Вас у бібліятэку. Прыходзьце!
