Адкрыццё семінара пачалося ў Цэнтральнай бібліятэцы імя М. Гарэцкага прывітальным словам намесніка начальніка аддзела ідэалагічнай работы, культуры і па справах моладзі Вольгі Аляксандраўны Панасюк, якая пазнаёміла прысутных са структурай аддзела, расказала пра дасягненні ўстаноў культуры і пажадала плённай працы ўдзельнікам. Дырэктар Горацкай раённай бібліятэчнай сеткі Наталля Міхайлаўна Ермалаева правяла экскурсію і пазнаёміла калег з арганізацыяй бібліятэчнай прасторы цэнтральнай бібліятэкі імя М. Гарэцкага, работай аддзела бібліятэчнага маркетынгу, аддзела абслугоўвання і інфармацыі.

За круглым сталом былі разгледжаны задачы, якія ставяцца дзяржавай і грамадствам перад бібліятэкамі, актуальныя пытанні іх дзейнасці ў сучасных умовах, ролі ўласных інфармацыйных сайтаў па прыцягненні новых карыстальнікаў, новых падыходах у арганізацыі работы па прыцягненні дзяцей і падлеткаў да чытання юнацкім аддзелам абласной бібліятэкі, вопыце работы і перспектывах развіцця ў інфармацыйнай і сацыякультурнай прасторы рэгіёна Круглянскай БС, электронных інфармацыйных рэсурсах Горацкай БС, дзейнасці Клімавіцкай БС па духоўна-маральным выхаванні і асвеце і іншыя. У сваім выступленні дырэктар Магілеўскай абласной бібліятэкі імя У.І. Леніна Ілона Уладзіміраўна Сарокіна скіравала ўвагу на патрабаванні дзяржаўнай праграмы “Культура Беларусі на 2016-2020 гг.” у частцы, што датычыцца дзейнасці бібліятэк рэспублікі, а таксама ва ўрачыстай абстаноўцы адзначыла падзячнымі лістамі ўдзельнікаў навукова-практычнай канферэнцыі “Пысінскія чытанні-2016”.

Далей удзельнікі семінара наведалі дзіцячую бібліятэку і дзве бібліятэкі аграгарадкоў, каб на свае вочы пераканацца, як арганізавана бібліятэчная справа ў раёне.

Асноўным накірункам дзейнасці Рэкцянскай сельскай бібліятэкі на працягу многіх год з’яўляецца пошукава-краязнаўчая работа. Наведванне гэтай бібліятэкі не было выпадковым. Літаральна напярэдадні ў ХХІV Рэспубліканскім конкурсе “Бібліятэка – асяродак нацыянальнай культуры” ў намінацыі “За пошукавую і даследчую працу” Рэкцянская сельская бібліятэка была ўзнагароджана Дыпломам ІІ ступені. Шматгадовая пошукавая дзейнасць бібліятэкара Любові Елізараўны Валчковай і руплівы творчы падыход супрацоўнікаў цэнтральнай бібліятэкі імя М.Гарэцкага прынеслі заслужаную перамогу ў такім важным прафесійным конкурсе.

Падчас наведвання Ленінскай сельскай бібліятэкі яе загадчыца Іна Георгіеўна Белягіна расказала пра работу бібліятэкі па інфармацыйна-культурным абслугоўванні насельніцтва. Фальклорныя пасядзелкі “Сядзем радком, ды пагаворым ладком”, падрыхтаваныя разам з супрацоўнікамі СДК і ДзШМіМР, наглядна прадэманстравалі не толькі зладжаную сумесную працу ўстаноў культуры, але і як захоўваюцца і ажываюць сёння традыцыі мінулага на ленінскай зямлі. А пасля кожны, хто пажадаў, змог прыняць удзел у майстар-класах па пляценні паясоў, ганчарстве, вышыўцы.

Шмат удалых прафесійных і творчых напрацовак у арганізацыі бібліятэчнай прасторы і абслугоўванні чытачоў было запазычана ў час знаёмства з работай раённай дзіцячай бібліятэкі. За апошнія чатыры гады карэнным чынам змяніўся не толькі інтэр’ер бібліятэкі, але і падыходы ў арганізацыі бібліятэчнай прасторы і абслугоўванні чытачоў. Намаганнямі саміх бібліятэкараў з дапамогай пэндзля, фарбаў і фантазіі, бібліятэка сапраўды стала дзіцячай: каляровыя стэлажы, яркія, арыгінальныя і прывабныя выставы, намаляваныя на сценах героі любімых кніг, казачныя замкі і шмат іншых задумак. Маладыя, ветлівыя, добразычлівыя бібліятэкары заўседы знаходзяцца ў пошуку і не спыняюцца на дасягнутым. Дырэктар Магілеўскай абласной бібліятэкі падзякавала калектыў за ўклад ў прасоўванне дзіцячага чытання і пажадала далейшых творчых і прафесійных поспехаў.

Напрыканцы ўдзельнікі семінара адзначылі высокі прафесійны ўзровень сустрэчы і яе карысць для кожнага. За дзень насычанай працы дырэктары сталі дружнай бібліятэчнай сям'ёй і нават праліўны дождж не перашкодзіў добраму настрою.

Фотагалерэя