Праграма канферэнцыі была вельмі насычанай. Кандыдаты філалагічных навук, члены Саюза пісьменнікаў Беларусі, студэнты факультэта журналістыкі МДУ імя А. Куляшова, кіраўнікі літаратурных аб’яднанняў, супрацоўнікі Магілёўскай абласной бібліятэкі і бібліятэк вобласці абмеркавалі шэраг тэм, звязанных з рознымі аспектамі літаратурнай дзейнасці Магілёўшчыны. Галоўным аб’ектам даследвання, безумоўна, быў жыццёвы і творчы шлях Аляксея Васільевіча Пысіна, яго журналісцкая дзейнасць, гуманістычныя матывы ў творчасці і творы для дзяцей.

Акрамя асобы Аляксея Пысіна, на канферэнцыі абмяркоўваліся і пытанні, звязаныя з літаратурным краязнаўствам. Горацкі край быў прадстаўлены выступленнямі загадчыцы аддзела абслугоўвання Цэнтральнай бібліятэкі імя М. Гарэцкага А. Марозавай з дакладам “Горацкі Гарэцкі. Папулярызацыя жыцця і творчасці Максіма Іванавіча Гарэцкага” і кіраўніка народнага аматарскага аб’яднання “Роднае слова” Л. Дзеружковай з дакладам “На ніве творчасці” (аб літаратурных традыцыях горацкай зямлі і 30-ці гадовай дзейнасці аматарскага народнага аб’яднання “Роднае слова”, што працуе пры ДУК “Горацкі гісторыка-этнаграфічны музей”).

1 лютага 1993 года, з нагоды 100-годдзя з дня нараджэння пісьменніка, вучонага, даследчыка літаратуры, крытыка, лексікографа і фалькларыста Максіма Гарэцкага, Пастановай Савета Міністраў Рэспублікі Беларусь Горацкай раённай бібліятэцы было прысвоена імя пісьменніка.

З таго часу пачалася крапатлівая праца па збору, захаванні і папулярызацыі жыццёвага і творчага шляху пісьменніка.

У чытальнай зале сфарміраваны фонд, які складаецца з кніг, брашур, перыёдыкі, аудыё-відэаматэрыялаў, электронных рэсурсаў.Сёння тут маюцца дзясяткі артыкулаў з часопісаў і газет, фотаздымкі пісьменніка, лісты да родных, публікацыі аб ім. Беражна захоўваецца памятны медаль да 100-годдзя з дня нараджэння і лісты ад дачкі пісьменніка Галіны Максімаўны, з якой бібліятэка раней вяла перапіску. Зусім нядаўна Уладзімір Ягоўдзік перадаў бібліятэцы ўспаміны Яўгеніі Лобан, якая вучылася ў 1-м класе Віленскай гімназіі ў Максіма Гарэцкага.

Штогод у лютым у бібліятэцы праходзіць тыдзень прапаганды творчасці М. Гарэцкага пад агульнай назвай “Памяці М. Гарэцкага”. Стала добрай традыцыяй у дзень нараджэння пісьменніка, 18 лютага, прадстаўляць увазе наведвальнікаў бібліятэкі электронную выставу. Упершыню яна дэманстравалася з нагоды 120-годдзя з дня нараджэння пісьменніка і праходзіла пад назвай “З юбілеем, Максім Гарэцкі”.

Менавіта гэтыя і іншыя аспекты па прапагандзе творчасці пісьменніка бібліятэкарамі асвятляла ў сваім дакладзе А. Марозава. Таксама да выступленя была падрыхтавана аднайменная электронная прэзентацыя (глядзець)

Прэзентацыя “Горацкі Гарэцкі”