21 лютага – Міжнародны дзень роднай мовы
|
|
Мова родная, мова дзядоў! Ларыса Геніюш |
У кожным куточку Зямлі, дзе б'ецца беларускае сэрца, жыве беларуская мова. Жыве па-рознаму: у штодзённай гамонцы, у песнях і казках, у школьных падручніках і цудоўных творах літаратуры, нарэшце, проста жыве ў генах людзей, каб потым прагучаць з вуснаў іх дзяцей або ўнукаў. Менавіта праз родную мову, праз слова адраджаецца душа чалавека, душа народа, душа нацыі…
Да Міжнароднага дня роднай мовы на абанеменце Раённай бібліятэкі імя Максіма Гарэцкага распачала дзейнасць выстава літаратуры пад назвай “Мілагучнае, роднае, звонкае слова”.
На выставе экспануюцца кнігі і часопісы, якія распавядаюць пра гісторыю станаўлення і развіцця беларускай мовы, багацце роднага слова, а таксама мастацкія творы сучасных аўтараў, для якіх беларуская мова – крыніца натхнення.
Выстава змяшчае выданні энцыклапедычнага характару, навукова-папулярныя і мастацкія творы, падручнікі, слоўнікі і даведнікі на беларускай мове.
Дапаўняюць экспазіцыю каляровыя паштоўкі, якія дапамогуць адчуць смак беларускай мовы, а таксама “апрануцца” па-беларуску.
Cёння ў свеце шмат цудоўных моў. Адны з іх вабяць сваёй прыгажосцю і непаўторнасцю, другія – мілагучнасцю. Мала хто ведае, што паводле даследвання, праведзенага ЮНЕСКА, беларуская мова – самая мілагучная пасля італьянскай.
19 лютага Раённая бібліятэка запрашае ўсіх далучыцца да роднага, мілагучнага слова і прыняць ўдзел у акцыі “Размаўляем па-беларуску”.
Размаўляйце разам з намі з прыветнай усмешкай, з пяшчотай на вуснах!
Выстава дзейнічае да 6 сакавіка.
