Творчы шлях Галіны Сяргееўны не зусім звычайны. Днём працуючы медсястрой у звычайнай Магілёўскай паліклініцы, па начах Галіна Пярун пісала свой першы раман. На злосць зласліўцам мама траіх дзяцей у 35 гадоў без усякай падрыхтоўкі паступіла ў ВНУ, на выдатна абараніла дыплом і адкрыла ў сабе новы талент: пачала пісаць дзіцячыя кнігі на роднай беларускай мове і ставіць па іх лялечныя спектаклі.

Варта адразу падкрэсліць, што гадзіна, адведзеная на літаратурна-творчую сустрэчу, праляцела незаўважна для ўсіх удзельнікаў суботняга мерапрыемства. Пісьменніцы адразу ж удалося наладзіць кантакт з маленькімі слухачамі так, быццам гэта была не першая сустрэча з імі, а шчырая размова з даўно знаёмымі сябрамі. А галоўнае, Галіна Сяргееўна – займальны апавядальнік і выдатная суразмоўца. На творчай сустрэчы яна прэзентавала свае новыя кнігі: «Прыгоды сяброў і парады ад Усімдапамагайкіна», «Лясныя свавольнiкi» і «Закаханы скідзень», а затым разам з прысутнымі адправіліся ў вандроўку па старонках кніг, якія былі прадстаўлены тут жа на выстаўцы. На прэзентацыі пісьменніца падзялілася сваімі пачуццямі і ўражаннямі ад працы над кнігамі, у кожную з каторых, відавочна, уклала часцінку сваёй душы.

Пісьменніца жартавала, прапаноўвала запамінаць і тлумачыць незнаёмыя словы і расказвала пра свае творы. Таму дзеці з задавальненнем слухалі яе, цікавіліся творчым шляхам і задавалі шмат пытанняў. Школьнікі пыталіся, як нараджаюцца творы, што натхняе іх аўтара, колькі трэба часу, каб напісаць кнігу, адкуль бяруцца ідэі для апавяданняў і што адчуваеш, калі бачыш свой твор у руках чытачоў.

А напрыканцы сустрэчы пісьменніца пазнаёміла дзяцей са сваімі чароўнымі лялькамі з уласнага лялечнага тэатра «БІ-БА-БО», якіх робіць сама і ставіць спектаклі. Пасля чаго адбыўся паказ па казцы «Як ліса гаспадыняй у дзеда была».

Займальная пастаноўка, сумеснае чытанне, літаратурная віктарына, салодкія падарункі ад пісьменніцы і цёплыя адкрытыя зносіны. Час праляцеў незаўважна, але ніводзін з прысутных не застаўся без увагі.

Шмат цёплых, шчырых слоў у адрас госці прагучала ад калег па пяру, горацкіх аўтараў: Наталлі Ніканчук, Людмілы Дзёменскай, Ларысы Грушынай, Алесі Азаранкі. Верш прысвяціў ёй паэт Аляксандр Ведзянееў з пажаданнямі новых творчых поспехаў і новых твораў.

Шчырыя эмоцыі і сапраўдная зацікаўленасць – самая вялікая ўзнагарода для аўтара! А гледзячы на натхнёныя вочы дзетак, зразумела, што добрая і пазнавальная гісторыя Галіны Пярун прыйшлася ім даспадобы. Усе жадаючыя прыхільнікі літаратуры змаглі атрымаць аўтограф пісьменніцы і зрабіць фатаграфію на памяць.

Як добра, што ў сучаснай беларускай літаратуры ёсць пісьменнікі, здольныя сваёй творчасцю перанесці чытача ў свет казкі, фантазіі і незабыўных уражанняў.

Чакаем ад аўтара новых кніг і новых захапляльных сустрэч.