Спачатку вядучыя мерапрыемства Ульяна Баравікова і Вікторыя Шыловіч расказалі пра гісторыю свята, прыгажосць і багацце роднага слова і яго вялікае значэнне ў жыцці народа. У выкананні студэнтаў гучалі вершы аб роднай і на роднай мове беларускіх паэтаў.

Прысутныя аўтары дэкламавалі свае вершы і ўрыўкі з твораў. Алеся Цэван прачытала вершы “Вечная любоў”, “Беларусь”, Не згараючы” і інш. Звяртаючыся да моладзі, яна адзначыла: “Наша родная мова такая непаўторная, мілагучная і пявучая, яна нібы ўвабрала ў сябе гоман гаёў і лугоў, палёў і рэк, духмяны пах роднай зямлі і хлеба. Для народа родная мова – гэта найвялікшы скарб, які нельга страціць. Бо менавіта мова – гэта характар народа, яго памяць, гісторыя і культурная каштоўнасць. У ёй знаходзяць адлюстраванне звычаі, традыцыі, побыт народа, яго розум і вопыт, сіла і прыгажосць”.

Людміла Дзёменская пабудавала сваё выступленне ў форме дыялогу – і студэнты з задавальненнем успомнілі вершы, якія калісьці вучылі ў школе: “Родная мова”, “Пахне чабор…”, “Зорка Венера” і інш. Яны выказвалі свае адносіны да роднай мовы, гаварылі аб тым, як важна размаўляць, карыстацца ёю ў паўсядзённым жыцці і думаць па-беларуску. Людміла Уладзіміраўна таксама прачытала свой новы празаічны твор “Ішоў чалавек па зямлі…” і пажадала моладзі шанаваць зямельку-маці і берагчы мір.

Зацікавілі слухачоў таксама і песні “Беларусі” і “Гімн коласу” на словы члена Саюза пісьменнікаў Беларусі Ніны Кавалёвай і горацкага паэта Аляксандра Клачкова. Вядомая салістка Надзея Курбасава кранула аўдыторыю душэўным выкананнем песень “Аб маці і роднай хаце” і “Цячэ рэчанька…”. Прачытала яна і асабісты верш “Мая вёска”.

Супрацоўнікамі цэнтральнай бібліятэкі імя Максіма Гарэцкага была падрыхтавана літаратурная выстава “Мова – крыніца ўсёй прыгажосці”, дзе экспанаваліся выданні класікаў беларускай літаратуры, кнігі па гісторыі, стылістыцы і культуры маўлення, а таксама зборнікі магілёўскіх і горацкіх пісьменнікаў на беларускай мове.

Мерапрыемства садзейнічала выхаванню ў моладзі павагі да роднага беларускага слова і разуменню неабходнасці ведаць яго і шанаваць.