Бібліятэкі сеткі да 140-годзя з дня нараджэння класіка беларускай дзіцячай літаратуры падрыхтавалі кніжныя выставы: “Чараўнік з краіны маленства”, “Мудрэц з душою хлапчука”, “Бацька беларускай дзіцячай літаратуры”, “Наш вечны рабінзон”, “Вандроўнік, шукальнік, летуценнік”. Экспазіцыі змяшчалі матэрыялы пра жыццё і творчасць таленавітага беларускага пісьменніка, знаёмілі з яго творамі гістарычнай, ваеннай, прыгодніцкай і фантастычнай тэматыкі.

Першай кнігай Янкі Маўра стала аповесць “Чалавек ідзе” (1927). Потым былі кнігі “У краіне райскай птушкі” (1927), “Сын вады” (1928), “Амок” (1929), “Палескія рабінзоны” (1930), “ТВТ” (1934), “Слёзы Тубі” (1935), “Вакол свету” (1947), “Шлях з цемры” (1948), “Апавяданні і аповесці” (1969). Творы Янкі Маўра перакладаліся на рускую, украінскую, літоўскую мовы, выдаваліся ў Чэхаславакіі, Амерыцы, Англіі.

Пісьменнік з багатай фантазіяй, які ніколі не бываў за мяжой, але дакладна перадаваў у сваіх творах экзатычнасць прыроды і жыццё іншаземных народаў. Ён выдатна валодаў міжнароднай мовай эсперанта і вёў актыўную перапіску з настаўнікамі многіх краін: Англіі, Новай Зеландыі, Інданезіі, Амерыкі і інш.

З 1993 г. прысуджаецца Літаратурная прэмія імя Янкі Маўра за лепшыя творы для дзяцей. Надзвычай высока шанавалі талент пісьменніка, яго заслугі перад роднай культурай і літаратурай Янка Купала, Іван Мележ, Міхась Лынькоў.

Кнігі Янкі Маўра і сёння захапляюць юных чытачоў, спрыяюць развіццю фантазіі, прымушаюць задумацца аб праблемах развіцця чалавека, лёсу планеты Зямля і цэлага Сусвету.