«На працягу падарожжа па Беларусі мы высветлім, што вы ведаеце пра сваю краіну, палюбуемся на прыгожыя беларускія краявіды, прыслухаемся да песень, што спявае наша родная зямля, а таксама даведаемся шмат новага і цікавага», – адзначыла бібліятэкар. Пачалося мерапрыемства музычна. Вядучая прапанавала дзецям праслухаць песню «Мой родны кут» і назваць аўтара яе слоў. А пасля пачалося само падарожжа з тэматычнымі прыпынкамі. На першым прыпынку прысутным па апісанні трэба было здагадацца, пра які архітэктурны сімвал Беларусі ідзе гаворка, на другім – па апісанні вызначыць гістарычную асобу, на трэцім – пазнаць сучасных вядомых дзеячаў Беларусі па фотаздымку. Наступны прыпынак быў прысвечаны роднай мове. Дзеці называлі па-беларуску ягады і кветкі, апраналі гаспадыню і гаспадара ў традыцыйнае беларускае адзенне. Паслухалі прысутныя і пра беларускія нацыянальныя паркі, запаведнікі і заказнікі, якія складаюць прыроднае багацце Беларусі. Падчас мерапрыемства заданні, якія прапаноўвала бібліятэкар, чаргаваліся з выступленнямі вучняў, якія дэкламавалі вершы на беларускай мове.