1 лютага 1938 года ў в. Капань Рэчыцкага раёна Гомельскай вобласці нарадзілася беларуская паэтэса, празаік, перакладчыца – Нэлі, або Анэля, Тулупава, якой сёння споўнілася б 80 гадоў. Нэлі Іванаўна – аўтар такіх паэтычных зборнікаў, як «Станцыя надзей», «Дабрадзея», «Босая цішыня», «Сонца ў хату». Пісала яна і для дзяцей. Яе кнігі «Дожджык Мікіта», «Бізоны-рабінзоны», «Пра што думае кіт» знаходзяць свайго маленькага чытача і сёння. Ёй належаць і гумарыстычныя творы. Пасля выхаду кнігі гумарэсак «Як павезлі мяне сватаць» пісьменніцу нават запрасілі працаваць у рэдакцыю часопіса «Вожык». Яшчэ Нэлі Тулупава займалася мастацкім перакладам: знаёміла беларускую аўдыторыю з кітайскай паэзіяй. Звязаны жыццёвы лёс паэткі і з нашым горадам. У 1962 годзе Нэлі Тулупава пераехала ў Горкі, дзе працавала інструктарам РДК, медсястрой у бальніцы, рэдактарам газеты «Советский студент» БДСГА. У пачатку 2001 года жанчына прыняла пострыг, а 30 ліпеня гэтага ж года пайшла з жыцця ўжо манахіняй Неанілай.

З нагоды юбілея паэткі і пісьменніцы на абанеменце цэнтральнай бібліятэкі імя М. Гарэцкага распачала дзейнасць выстава «Мелодыі дабрыні і вечнасці», на якой можна пазнаёміцца з творчасцю гэтай таленавітай жанчыны.

• < Назад
• Вперёд >