Васіль Каваль належыць да той пляяды беларускіх пісьменнікаў, што прыйшлі ў літаратуру 20-х гадоў з народных глыбінь. Адметнасць яго творчасці ў пранікнёным і тонкім лірызме, з якім малады пісьменнік распавядаў пра сучаснае яму жыццё, у глыбокай павазе і даверы да сваіх герояў, ва ўменні шчыра спачуваць чалавечаму гору, разумець пакуты чалавека. Свой творчы шлях Васіль Каваль пачаў у 1925 г. з вершаў, а потым перайшоў да напісання празаічных твораў. Яму належаць кнігі апавяданняў «Як вясну гукалі», «На загонах», «Крыніца», аповесці «Санька-сігналіст» і «Следапыты».

На жаль, жыццёвы і творчы шлях пісьменніка абарваўся вельмі рана, ва ўзросце 30 гадоў. Як і многія іншыя мастакі слова таго складанага часу, Васіль Каваль аказаўся ахвярай масавых рэпрэсій і ў 1937 годзе быў расстраляны. Ужо 80 гадоў няма пісьменніка, аднак яго творчая спадчына жыве і займае значнае месца ў нацыянальнай мастацкай прозе.

На выставе, прысвечанай нашаму земляку, прадстаўлены брашуры і артыкулы пра жыццё і творчы шлях Васіля Каваля, а таксама кніга выбраных твораў пісьменніка. Экспазіцыя будзе цікавай усім, хто хоча бліжэй пазнаёміцца з творчай асобай маладога і таленавітага аўтара.