Адразу пасля Сусветнага дня свабоды друку сваё прафесійнае свята адзначаюць беларускія працаўнікі друкаванага цэху. Зразумела, што гэта прадстаўнікі мноства прафесій, але аб’ядноўвае іх адно — стваральная праца, накіраваная на забеспячэнне адзінай інфармацыйнай прасторы Рэспублікі Беларусь. Сярод тых, хто нясе грамадзянам важную і патрэбную інфармацыю пра падзеі побач, асвятляе актуальныя мясцовыя праблемы, — у першую чаргу трэба адзначыць супрацоўнікаў легендарнай раённай газеты "Горацкі веснік". Гэта сапраўдныя прафесіяналы сваёй справы, якія вось ужо амаль сто гадоў шчыра адданыя свайму апантанаму прызначэнню, годна і сумленна асвятляюць падзеі, што адбываюцца вакол нас, дзейсна дапамагаюць землякам з Горак і раёна ў вырашэнні значных сацыяльных задач. Штодзённая высакародная праца гэтых людзей забяспечвае адно з галоўных правоў кожнага беларуса — права свабоды слова. Тысячы людзей з нецярпеннем чакаюць кожны наступны нумар, каб даведацца, што адбываецца навокал, чым жыве горад ды раён. Цэлае стагоддзе раёнка застаецца для горацкіх жыхароў самай папулярнай і запатрабаванай газетай, нясе сваім чытачам толькі самыя свежыя навіны, уздымае ў сваіх публікацыях тыя праблемы, што сапраўды хвалююць людзей. Допісы карэспандэнтаў "Весніка" — самая надзейная крыніца дакладнай і аб’ектыўнай інфармацыі. Дзякуючы якаснай дзейнасці газеты будуецца дыялог паміж уладай і жыхарамі, фарміруецца празрыстасць дзейнасці дзяржорганаў ды пазітыўны імідж Горацкага раёну ўвогуле.

Друкаванае слова мае велізарную моц і не страчвае свайго значэння ў сучасную тэхналагічную эпоху. У Горках яно гучыць у гонар дабра і творчасці, і таму заўсёды знаходзіць жывы водгук у сэрцах удзячных чытачоў.