Нарадзіўся Максім Багдановіч 9 снежня 1891 г. (паводле новага стылю) у Мінску ў сям’і настаўнікаў. Бацька – Адам Ягоравіч Багдановіч (1862-1940) паходзіў з сям’і беззямельнага селяніна, былога прыгоннага. Скончыў Нясвіжскую настаўніцкую семінарыю, працаваў выкладчыкам і кіраўніком гарадскога пачатковага вучылішча ў Мінску, ацэншчыкам і землеўпарадчыкам у Сялянскім зямельным банку ў Гродне, Ніжнім Ноўгарадзе, Яраслаўлі.

Маці – Марыя Апанасаўна Мякота (1869-1896) – скончыла настаўніцкія курсы ў Пецярбургу, займалася педагагічнай практыкай.

У 1892 г., амаль адразу пасля нараджэння Максіма, сям’я пераехала ў Гродна, а ў 1896 г., пасля смерці ад сухот Марыі Апанасаўны, Багдановічы змянілі месца жыхарства на Ніжні Ноўгарад.

Трэба адзначыць, што ў сям’і Багдановічаў размаўлялі па-руску, але лад жыцця, звычкі, густы, настрой думак у сваёй аснове былі беларускія. Тут дзеці чулі беларускія казкі, песні, прымаўкі. Бацька ўдзяляў шмат увагі сваім сынам, ён прышчапіў ім любоў да літаратуры.

1907 г. лічыцца пачаткам літаратурнай дзейнасці Максіма Багдановіча. Яго першым значным мастацкім творам было беларускамоўнае празаічнае апавяданне “Музыка”, якое адразу ж надрукавала “Наша ніва”. У 1908 г. Максім Багдановіч напісаў першыя лірычныя вершы: “Над магілай”, “Прыйдзе вясна”, “На чужыне”, якія былі апублікаваны ў “Нашай ніве”. Шмат іншых вершаў маладога паэта члены рэдкалегіі газеты ў той час лічылі “дэкадэнцкімі” і не друкавалі.

Максім Багдановіч пражыў вельмі кароткае, але надзвычай плённае ў творчых адносінах жыццё. Ён дасягнуў шырокага прызнання сучаснікаў і нашчадкаў. Імя Максіма Багдановіча стаіць побач з такімі класікамі беларускай і сусветнай літаратуры, як Янка Купала і Якуб Колас. Яго творчая спадчына – істотная частка духоўнай культуры беларускага народа. У Максіма Багдановіча было шмат творчых планаў, ён хацеў выдаць шэраг паэтычных зборнікаў, але здзейсніць гэтыя намеры не змог. У канцы лютага 1917 г. з-за абвастрэння хваробы пакінуў Мінск і накіраваўся ў Крым. Аднак лячэнне не дапамагло, і 25 мая 1917 г. у двадцаціпяцігадовым ўзросце Максім Багдановіч памёр.

Творы беларускага паэта перакладзены на два дзясяткі моў свету (сярод іх такія распаўсюджаныя, як англійская, іспанская, нямецкая, польская, руская, украінская, французская), публікаваліся ў Вялікабрытаніі, Германіі, Польшчы, Расіі, Францыі, Югаславіі і іншых краінах.

Творы беларускага паэта перакладзены на два дзясяткі моў свету (сярод іх такія распаўсюджаныя, як англійская, іспанская, нямецкая, польская, руская, украінская, французская), публікаваліся ў Вялікабрытаніі, Германіі, Польшчы, Расіі, Францыі, Югаславіі і іншых краінах.

Выстаўка дзейнічае да 31 снежня.