«Ясная ночка купальская»
У ноч з 6 на 7 ліпеня на Беларусі адзначаецца народнае свята Купалле (Купала, Ян, Іван). Гэта адно з найбольш яскравых, маляўнічых і паэтычных абрадаў у беларусаў. Купалле захавалася і дажыло да нашых дзён разам з купальскімі песнямі, яно багата сваімі абрадамі, паданнямі і легендамі.
6 ліпеня супрацоўнікі Ленінскага сельскага дома культуры і Ленінскай сельскай бібліятэкі падрыхтавалі для аднавяскоўцаў свята «Ясная ночка купальская», якое адбылося на Цэнтральнай плошчы.
Жыхары і госці аграгарадка прынялі ўдзел у старажытных абрадах, танцах і карагодах, шукалі папараць-кветку. Добры і лагодны настрой стваралі ансамбль народнай песні “Церніца”, вакальныя групы “Вітава”, “Ружа” і салісты СДК. Было чым заняцца на свяце і малым: для іх працавалі атракцыёны, а вячэрняя дыскатэка аб’яднала ўсіх і зарадзіла пазітыўнымі эмоцыямі.
Кульмінацыяй свята стала цырымонія запальвання купальскага агню – аднаго з галоўных атрыбутаў купальскай ночы, сімвала ачышчэння і пазбаўлення ад хвароб.
