Да гэтай значнай даты бібліятэкі сеткі падрыхтавалі кніжныя выставы, якія сталі своеасаблівымі падарожжамі ў свет беларускай культуры, гісторыі і літаратуры. «Наш гонар — асветнікі Беларусі», «Ад літары да кнігі», «Пад небам беларускага пісьменства», «Славутыя асветнікі зямлі беларускай», «Кніга — крыніца пазнання», «Добры дзень, кніжка беларуская», «Дар просветителей белорусских» — кожная з іх адкрывае чытачу сваю старонку вялікай кнігі беларускага слова. На выставах можна дакрануцца да гісторыі ўзнікнення пісьменства, пазнаёміцца з жыццёвым і творчым шляхам выдатных асветнікаў, успомніць класікаў беларускай літаратуры, а таксама адкрыць для сябе творы, у якіх жыве душа народа. Старонкі кніг тут нібы размаўляюць з наведвальнікамі, распавядаючы пра нашу спадчыну, родную мову, традыцыі і вечныя каштоўнасці.

Асаблівым працягам кніжных экспазіцый сталі тэматычныя мерапрыемствы, якія аб’ядналі дзяцей і бібліятэкараў у цікавай і пазнавальнай размове пра беларускую кнігу і пісьменства. Падчас гістарычнага экскурсу «Кніга — духоўная скарбніца беларусаў» бібліятэкары запрасілі дзяцей у захапляльнае падарожжа па гісторыі кнігі — ад старажытных рукапісных старонак да сучасных выданняў. Удзельнікі даведаліся, як развівалася беларускае пісьменства, якую ролю ў захаванні ведаў адыгралі кнігі, чаму праца перапісчыкаў і першадрукароў стала важнай часткай культурнай спадчыны. Асаблівая ўвага была нададзена людзям, якія сваімі ведамі, працай і любоўю да слова дапамагалі беларускаму народу захоўваць духоўныя скарбы праз пакаленні.

Падчас тэматычнай гадзіны «Дар просветителей белорусских» размова ішла пра славутых асветнікаў Беларусі, іх імкненне несці людзям веды і адукацыю. Бібліятэкары пазнаёмілі дзяцей з імёнамі і справамі выдатных дзеячаў беларускай культуры, расказалі пра значэнне асветніцкай дзейнасці і пра тое, як дзякуючы самаадданай працы гэтых людзей развіваліся кніжнасць, адукацыя і культура. Дзеці адказвалі на пытанні, успаміналі вядомыя імёны і пераканаліся, што кніга заўсёды была і застаецца сапраўднай крыніцай ведаў.

Дзень беларускага пісьменства — гэта эта свята памяці і гонару, свята кнігі і роднага слова, якое дапамагае нам не губляць сувязь з каранямі. Пакуль мы адкрываем кнігі, чытаем вершы і апавяданні, захапляемся творчасцю пісьменнікаў і перадаем любоў да беларускай мовы дзецям, жыве наша культурная спадчына. Бо слова, аднойчы запісанае на старонцы, здольнае пераадолець час. Яно захоўвае галасы продкаў, мудрасць пакаленняў, любоў да роднай зямлі і надзею на будучыню. І няхай кожная новая сустрэча з беларускай кнігай становіцца маленькім адкрыццём, якое дапамагае яшчэ мацней адчуць: беларускае слова — гэта жывая памяць нашага народа, яго душа і яго святло.