У суботу 7 верасня з самай раніцы ў дзіцячым парку г. Горкі панавала ажыўленая атмасфера. Жыхары горада трапілі на яркае запамінальнае раённае фальклорнае свята «Жытнёвы звон». У праграме былі заяўлены шматлікія мерапрыемствы: пленэр, разнастайныя майстар-класы, выставы, гульні, спартыўныя і творчыя конкурсы, а таксама выступленні творчых калектываў.

Супрацоўнікі цэнтральнай бібліятэкі ім. М. Гарэцкага прынялі актыўны ўдзел у свяце. Была арганізавана літаратурна-інтэрактыўная пляцоўка з тэматычнай выставай-экспазіцыяй «Дзякуй шчыра за хлеб і за колас!», якая была аформлена з выкарыстаннем садавіны, гародніны, прыроднага матэрыялу, старажытных прадметаў побыту. Кнігі, прадстаўленыя для прагляду, дазволілі наведвальнікам больш падрабязна пазнаёміцца з тым, як адзначалі нашы продкі найбольш значныя ў іх жыцці каляндарныя і сямейна-бытавыя святы.

Госці тэматычнай пляцоўкі маглі не толькі пазнаёміцца з экспазіцыяй, яны, пры дапамозе старажытных прылад хатняга ўжытку нашых продкаў, з вялікай зацікаўленнасцю паспрабавалі малоць жыта ў муку з дапамогай ручнога млыну, шпарка білі калатоўкаю ў бойцы, быццам збівалі масла, звязалі у снапы лён, а затым мялі і церабілі яго ад кастрыцы. Таксама пагулялі ў традыцыйныя беларускія гульні «У мядзведзя на бары», «Каза рагатая», «Гарачая бульба», «Лянок», адгадвалі загадкі і прынялі ўдзел у чытанні скорагаворак.

Багатая наша Беларусь на святы, абрады, традыцыі, якія перадаюцца нам ад пакалення да пакалення. Будзе вельмі выдатна, калі гэтую спадчыну, гэтае багацце мы не забудзем, будзем берагчы і захоўваць, таму што гэта наша Радзіма, наша Беларусь.