«Па рушніку, што з роднай хаты, мы пазнаём сваю Радзіму» – пад такой назвай супрацоўнікі філіяла «Ленінская сельская аб’яднаная бібліятэка» правялі фальклорную вечарыну.

Беларускі ручнік адносіцца да тых прадметаў, якія належаць і мінуламу, і сучаснасці. Шмат стагоддзяў карыстаюцца ім беларусы. Ткуць і расшываюць яго і сёння, працягваючы ўдасканальваць прыгажосць, над якой працавала мноства папярэдніх пакаленняў. Цікавасць да гэтага прадмета абумоўлена не толькі прыгажосцю яго тканага, вышыванага або плеценага дэкору, але і цеснымі сувязямі з абрадавым жыццём народа, сімволікай шматлікіх функцый. Беларускі рушнік аб’ядноўвае мінулае і будучае загадкавым арнаментам і ўзорам. Рушнік з’яўляецца спадарожнікам у знакавых момантах нашага жыцця. Ён з намі ад самага нараджэння і да канца жыцця, звязаны з рознымі абрадамі і звычаямі. То ён ператвараецца ў спавівальны для немаўлятка, то ў шлюбны падножнік, які дзяўчына атрымоўвала ад сваёй маці, захоўвала яго і перадавала з пакалення ў пакаленне. Ён упрыгожвае самае галоўнае месца ў хате, на покуце, дзе заўсёды знаходзяцца абразы. Узоры тканых і вышываных вырабаў – зашыфраванае апавяданне аб жыцці народа. Там, як у добрай кніжцы, можна дазнацца пра ўсе, што ёсць у жыцці. Ручнікі розных рэгіёнаў адрозніваюцца мясцовым каларытам, формай і размяшчэннем узору, тэхнікай выканання.

Менавіта аб ручніках ішла размова на мерапрыемстве, бібліятэкары пазнаёмілі дзяцей з гісторыяй узнікнення беларускага старажытнага ручніка і ручнікамі сваёй мясцовасці, разнастайнасцю арнаментаў і значэннем сімвалаў, а таксама традыцыях іх выкарыстання. Прысутныя мерапрыемтсва пазнаёміліся з кнігамі на дадзеную тэму.