Нарадзілася будучая паэтка ў 1913 годзе ў Мінску. Усё сваё жыццё Эдзі Сямёнаўна пісала для дзяцей. Яе яшчэ называюць беларускай Агніяй Барто: сваімі вершамі Эдзі Агняцвет стварыла цэлы сусвет беларускай дзіцячай паэзіі.

З-пад яе пяра выйшлі паэтычныя зборнікі «Міхасёк», «Маё пакаленне», «Краіна маленства», «Незвычайныя канікулы», «Хто пачынае дзень?», «Мы сур’ёзныя, мы вясёлыя», «Беларуская рабіна» і іншыя.

Вершам Эдзі Агняцвет уласціва лёгкасць і танцавальнасць, таму вялікая колькасць яе вершаў стала тэкстамі для песень беларускіх і рускіх кампазітараў. Яе вершы перакладзены на рускую, узбекскую і латышскую мовы.

Эдзі Сямёнаўна актыўна займалася перакладчыцкай дзейнасцю. Пераклала на беларускую мову асобныя творы А.С. Пушкіна, М.А. Някрасава, У.У. Маякоўскага, «Маленькага прынца» А. Экзюперы, вершы польскіх, літоўскіх, украінскіх паэтаў. Асабліва цудоўнымі атрымліваліся ў яе пераклады французскіх паэтаў. За кнігу «На двары алімпіяда» паэтка была ўзнагароджана Ганаровым дыпломам імя Г.Х. Андэрсена.

На выставах прадстаўлена літаратура аб жыццёвым і творчым шляху дзіцячай пісьменніцы, яе кнігі з фонду бібліятэк і іншыя выданні, дзе надрукаваны яе творы.

Паэзія Эдзі Агняцвет у аснове сваёй аптымістычная, светлая. Светлыя фарбы, добрая усмешка характэрны для яе вершаў аб дабрыні, аб прыродзе, аб умелых, таленавітых людзях, здольных ствараць прыгожае, абараняць здабытае ранейшымі пакаленнямі. Сёння творы Эдзі Сямёнаўны Агняцвет з асалодай чытаюць у дзіцячых садках, школах і бібліятэках. Яны вучаць дзяцей быць добрымі, працавітымі, чулымі і ўважлівымі, берагчы зямлю сваю – любімую Беларусь.