28 сакавіка ў аддзеле па абслугоўванню дзіцячага чытача адбылася эка-гульня “Сябруем з прыродай”. З гэтай нагоды ў бібліятэку завіталі вучні 1-4 класаў ДУА “Сярэдняя школа №1 г. Горкі”. Бібліятэкары расказалі сваім наведвальнікам аб тым, наколькі важна берагчы прыроду, дапамагаць дзікім жывёлам і птушкам. Яны даведаліся шмат новага аб вадзе, аб водных раслінах і жывёлах. Дзеці запомнілі, што недахоп чыстай вады – глабальная праблема сучаснасці. Дзеці пазнаёміліся з асаблівасцямі прафесіі “Эколаг”, змаглі самастойна пагартаць Чырвоную кнігу Беларусі, пад час гульні навучыліся правільна сарціраваць смецце ў залежнасці ад яго складу.

Чырвонай ніткай сустрэчы было напамінанне аб тым, як важна і неабходна берагчы дадзеныя нам прыродныя багацці: не забруджваць паветра атрутнымі рэчывамі, не забіваць бяздумна звяроў і птушак, не знішчаць расліны, не засмечваць вуліцы, лясы і вадаёмы.

Сустрэча прайшла ў цёплай атмасферы, дзеці з задавальненнем прымалі ўдзел у прапанаваных гульнях, адказвалі на пытанні, самі цікавіліся станам экалагічнай службы ў Горацкім раёне. У завяршэнне сустрэчы, школьнікі зрабілі выснову аб тым, што будучыня нашай планеты, яе экалогія, чысціня рэк і азёр залежаць толькі ад нас саміх!