З нагоды 130-годдзя класіка, супрацоўнікі цэнтральнай бібліятэкі імя М. Гарэцкага ў чытальнай зале бібліятэкі імя Д. Р. Новікава прапанавалі ўвазе наведвальнікаў літаратурна-музычную вечарыну “Вялікі чалавек з Малой Багацькаўкі”. Прысутныя змаглі не толькі пазнаёміцца з адметнымі старонкамі жыцця і творчасці Максіма Гарэцкага, але і дакрануцца да лірычных радкоў пісьменніка, атрымаць асалоду ад талента чытальнікаў, якія дэкламавалі вершы пранікненна, укладваючы душу ў кожнае слова.

Пісьменнік-мысляр, творца, які ўзняў узровень беларускай псіхалагічнай прозы да сусветнага ўзроўню, разважаў пра дзве душы беларуса і родныя карэнні, Максім Гарэцкі, загінуў у досыць маладым веку... Асуджаны на смерць несправядліва, без віны. Але спадчына яго настолькі вялікая, глыбокая, што яшчэ на вякі дасць падставу для роздуму беларусам.

Ён бачыў жыццё ва ўсіх яго шматлікіх і самых неверагодных праявах і выпрабаваннях. Ён сам бачыў святло ў цемры, разумеў і адчуваў велізарную духоўную сілу беларуса, яго нераскрытую маральную сілу. Сам жа крочыў па тым жыццёвым шляху, які ён вызначыў сам для сябе, шляхам мастацкай праўдзівасці — найлепшай дарогай літаратуры нашай...

Імя Гарэцкага і гады праз пасля яго несправядлівай, ранняй гібелі зіхаціць у сузор’і першапраходцаў беларускай культуры – свеціць ясным, чыстым і сумным святлом, бо доля гуманіста ў часы, пазбаўленыя гуманнасці, заўсёды цяжкая, а шлях слова непазбыўна горкі.

Хочацца верыць, што юбілейныя мерапрыемствы, у тым ліку і наша вечарына абудзяць цікавасць да творчасці пісьменніка і жаданне адкрыць для сябе новыя старонкі твораў аўтара.