|
“ПОЛЫМЯ” – жыццё даўжынёю ў 100 |
05.12.2022 |
…Гары ж і “Полымем” чырвоным
Шугні, агонь, і цемрадзь-сонь
Развей, згані ад краю ў край,
Іскрыся іскрамі, палай!
Якуб Колас, 1926 г.
У 2022 годзе беларускаму літаратурна-мастацкаму часопісу “Полымя” спаўняецца 100 гадоў. Гэты часопіс – знакавы не толькі для беларускай літаратуры, але і для беларускай культуры цалкам. Літаратурна-мастацкія перыядычныя выданні на сучасным этапе з’яўляюцца захавальнікамі культуры, маюць вялікае значэнне для стварэння адзінай сацыякультурнай прасторы.
З 5 па 20 снежня ў бібліятэцы ім. М. Гарэцкага з нагоды 100-гадовага юбілею часопіса арганізавана выстава “Полымя” – жыццё даўжынёю ў 100”. Выстава адлюстроўвае змест і настрой часопіса за апошніх некалькі гадоў.
На кніжнай выставе экспануюцца выдатныя творы беларускай літаратуры, якія друкаваліся на старонках часопіса. Сярод іх – раманы: “Людзі на балоце” Івана Мележа, “Птушкі і гнёзды” Янкі Брыля, “Сэрца на далоні” Івана Шамякіна; аповесць “Сотнікаў” Васіля Быкава, проза Івана Пташнікава і Барыса Сачанкі, п'есы Андрэя Макаёнка, вершы Кастуся Кірэенкі і іншых класікаў.
Экспазіцыя дэманструе літаратурныя традыцыі, закладзеныя папярэднімі пакаленнямі беларускіх майстроў слова, працягваюцца ў творах сучасных аўтараў у ліку якіх: Уладзімір Гніламёдаў, Віктар Праўдзін, Віктар Шніп, Мікалай Чаргінец і інш.
