На мерапрыемстве прысутнічалі горацкія аўтары, творы якіх уключаны ў альманах. Гэта члены Саюза пісьменнікаў Беларусі Наталля Ніканчук, Алеся Цэван і паэтэса Алеся Азаранка.

Падчас мерапрыемства прысутныя пазнаёміліся з кіраўніцтвам Саюза пісьменнікаў Беларусі і старшынямі абласных аддзяленняў. Асобая ўвага была ўдзелена старшыні рэспубліканскага аб’яднання Чаргінцу Мікалаю, кнігі якога карыстаюцца вялікім попытам сярод нашых чытычоў, і Аляксандру Казеку — рэдактару-ўкладальніку альманаха, старшыні Магілёўскага абласнога аддзялення Саюза пісьменнікаў Беларусі, творы якога можна было паслухаць ў відэазапісу ў выкананні аўтара.

Альманах складаецца з такіх раздзелаў як: “Паэзія”, “Проза”, “Нашы сябры”, “Новыя імёны”, “Пераклады”, “Публіцыстыка”, “Крытыка і літаратуразнаўства”, “Сатыра і гумар”.

Сваімі ўражаннямі аб зборніку падзяліліся горацкія аўтары. Наталля Ніканчук зрабіла даволі дэталёвы агляд альманаха, засяродзіла ўвагу на творах маладых аўтараў і падкрэсліла важнасць гэтай акалічнасці, таксама расказала гісторыю стварэння свайго твора, які ўвайшоў у альманах. Алеся Цэван і Алеся Азаранка выказалі станоўчыя меркаванні і прачыталі свае вершы. А творы Міхаіла Уласенкі, змешчаныя ў раздзеле “Сатыра і гумар”, гучалі ў выкананні супрацоўніцы бібліятэкі Дзіяны Цярэнцьевай. Свае думкі аб зборніку і ролі роднай мовы выказалі горацкі паэт Аляксандр Ведзянееў, аматар літаратуры Надзея Курбасава.

Новы альманах папоўніў краязнаўчы фонд бібліятэкі і знайшоў сваё пачэснае месца на выставе “Літаратурная прастора Магілёўскага краю”, што і зараз дзейнічае ў чытальнай зале бібліятэкі. Акрамя калектыўных выданняў, з фонду бібліятэкі, на выставе экспануюцца ўласныя кнігі нашых горацкіх аўтараў – членаў Саюза пісьменнікаў Беларусі: Наталлі Ніканчук, Алесі Цэван, Міхаіла Уласенкі, Ніны Кавалёвай і Сяргея Кісялёва.

Выстава будзе дзейнічаць да 30 снежня 2021 года.